Pagmimina

            Ang Pilipinas ay mayaman sa iba’t ibang uri ng mineral at mapapakinabangan lamang ito sa pamamagitan ng pagmimina na isang napakalaking industriya. Nagbibigay ito ng trabaho sa mga tao at ang pagmimina rin ay nasasabing nakatutulong sa paggawa ng mga kalsada at istruktura. Ang ating yamang mineral ay karaniwang nakukuha sa pagmimina, dito rin nakasalalay ang pamumuhay nang ilan sa ating mamamayan. Sa pagmimina, maraming sector ang naapektuhan mabuti man o masama ang epekto nito. Ang pagmimina ay madalas nagaganap sa mga bulubundukin lugar kung saan maraming matatagpuan na mga mineral gaya ng dyamante, graphites, ginto, at marami pang iba. Nakatutulong ba talaga ang industriyang ito sa atin? Ano-ano nga ba talaga ang mga epekto nito sa atin?

            Sa paglipas ng mga panahon, maraming mga kalsada na ang naipagawa dahil sa pagmimina. Ang pagmimina rin ay nakakatulong sa pag angkat ng mga materyales para sa mga istruktura. Subalit marami rin ang mga nasawi sa mga aksidenteng naganap dulot ng pagmimina. Maraming bulubundukin din ang nawasak dulot ng indutriyang ito. Nagdudulot ng matinding pagbaha, pagguho ng lupa, at erosion ang labis na pagmimina. Sa pagmimina nabibigyan ng mga trabaho ang ilan sa ating mamamayan, subalit ito ay pangsadalian lamang at wala itong kasiguraduhan kung tayo man ay may makukuhang mineral o wala. Tuwing may nagaganap na pagmimina lumalaki ang posibilidad na mawawasak nanaman ang mga tahanan ng ilan sa mga hayop, kung kaya’t marami sa ating mga hayop ang nauubos dahil sa kawalan ng tirahan at kakulangan sa pagkain. Permanente nitong sinisira ang kalikasan at nawawalan ng tirahan ang mga hayop. Ayon sa mga eksperto, mahigit sandaang taon ang bibilangin bago bumalik ang natural na komponent ng nasirang habitat. Hindi sapat ang trabaho at buwis na naiaambag ng mga industriya ng pagmimina sa pinsalang maaring maidulot nito sakaling gumanti ang kalikasan. Dahil dito ang nasirang kalikasan ay permanente na habambuhay at ang mga dating naninirahang hayop sa lugar at malapit dito ay hindi na maaaring bumalik pa. Walang pinipiling lugar ang pagmimina. Kahit sa mga lugar na may potensyal bilang destinasyon ng mga turista ay pinapayagan. Hindi maari na payagan ng gobyerno ang pagmimina sa ating bansa kung wala itong magandang maidudulot, hindi rin maari na payagan ng ating gobyerno ang pagmimina ng mga gahaman na mga dayuhan kapalit ng kakarampot nilang bayad sa pagkasira ng ating likas na yaman. Ayon kay Gina Lopez, ang turismo sa bansa ay industriyang maaring maging alternatibo sa pagmimina.

            Ang pagmimina ay pangmalawakan at pangmatagalan na pagkasira ng ating kalikasan kung kaya’t dapat natin itong itigil para sa ikabubuti ng ating kalikasan. Tigilan na ang pagmimina sumosobra na ang pinsalang dulot nito wala rin naman itong magandang idudulot sa atin at di naman pangmatagalan ang mga nakukuha natin sa pagmimina. Di natin alam na paubos na ang ating likas na yaman dulot ng pagmimina. Sa pagtigil natin sa pagmimina, mababawasan ang pinsala na maaring maidulot natin sa ating kalikasan. Napakadelikado ng pagmimina kung kaya’t dapat na nating itong itigil upang wala ng masawi at mapahamak. Dapat tayong umaksyon sa bawat mali na gawain upang maproteksyonan natin ang ating mga pinahahalagahan. Bilang mamamayan, dapat nating isulong ang ikakabuti ng ating mundo, mas dapat nating bigyang halaga ang mga likas na yaman na ipinagkaloob sa atin ng Diyos. Tayo ay ginawa ng Diyos bilang tagapangalaga ng ating kalikasan. Ang bawat mineral na ating nakukuha at madalas pa ay kakapiranggot na nabebenta sa maliit na halaga ay katumbas ng pagkapermanenteng pagkasira ng kalikasan at pagkamatay ng ilang manggagawa. Hindi natin kakayaninn na maibalik muli ang ating mga kalikasan na sinira ng pagmimina kaya dapat nating pangalagaan ang kalikasan bilang isang pangmatagalan na biyaya ng Diyos sa atin, at isulong ang kilusan laban sa pagmimina.